النتائج 1 إلى 9 من 9

الموضوع: نوادر السجون وأمن الدولة بقلم / أبو عبد القدير القمري ( إسماعيل جاد ) متجدد

  1. #1

    5 نوادر السجون وأمن الدولة بقلم / أبو عبد القدير القمري ( إسماعيل جاد ) متجدد


    1- ضابط أمن الدولة بيسأل أخ (محفظ قرآن) بيقوله:
    - أيه حكم ومن لم يحكم بما أنزل الله ؟؟؟
    رد عليه الأخ قائلا: "مد منفصل" يا باشا :))


    *****

    2- ضابط أمن الدوله بيسأل أخ بيقوله:
    ــ تعرف الدكتور سيد الصاوي ؟؟
    ــ فقل له الأخ: لا
    فغمزه ضابط أمن دولة آخر وقال له بصوت منخفض (اسمه صلاح الصاوي)
    فقال الضابط بصوت عالي للأخ : ولا ابن عمه الدكتور صلاح الصاوي :))

    *****

    3-ضابط أمن الدولة بيقول لأخ : أنت بتكفرنا ياله ؟
    فرد عليه الأخ خائفا : أنا بكفر اللي بيكفركم يا باشا
    راح الضابط قاله : وبتكفر تارك الصلاة ؟
    فرد الأخ : واللي بيصلي يا باشا :))

    *****

    4- ضابط أمن الدولة بيسأل أحد الاخوة،،
    تعرف فلان؟ يقوله: اه ، تعرف عنه أيه، يقوله: نحسبه على خير
    طب تعرف فلان؟ يقوله: اه ، تعرف عنه أيه، يقوله: نحسبه على خير ,,,,
    المهم آمن الدولة جبتهم كلهم واعتقلتهم، وسمتهم: تنظيم "الذين نحسبهم على خير" :))

    *****

    5- ضابط أمن الدولة بيعذب شاب بالكهربا، وبيسأله:
    ــ بتصلي فين يالا ؟؟
    الشاب قاله: والله يا باشا مبصلي
    الضابط راح مزود الكهربا وقال: ومبتصليش ليييييييييه، متعرفش أن تارك الصلاة كافر :)
    الشاب قاله: والله يا باشا مهسيب فرض تاني :)))

    *****

    6- أخ سوداني أمن الدولة مسكته وجبوه "لظغولي" أول ما دخل سأل الإخوة : أنتوا كتييييير كده ليييه؟
    رد الإخوة: كل واحد فينا بيتكهرب بيجب واحد تاني :)
    راح السوادني قال: إحنا زول سوداني ما يجيب زول سوادني، ومصر والسودان هته واحد.
    المهم الظابط نادى على السوادني، طلع اتكهرب جاب ابن عمه :)
    راح الإخوة قالولو: جبت أبن عمك يا زول، مش زول سوداني ما يجيب زول سوداني ؟!
    رد السوداني: زول سوداني يجييب كتيبه، والله الكهربا صعب كتيييييييير، ومصر والسودان ميت هته :)))

    *****

    7-ضابط أمن الدولة بيسأل الأخ سامح:
    - كنت هتروح العراق ازاي يالا ؟؟
    رد سامح: كنت هركب عربية لغاية المطار
    الضابط: أيوه وبعدين ؟؟
    سامح: وهركب طيارة بغداد
    الضابط: أيوه يا روح امك، هتنزل هتلقي عربية بتنادي بتقول "فلوجه فلوجه فلوجه" :)))

    ومن سعتها والأخ اشتهر في السجون باسم "سامح فلوجه"

    *****

    8- ضابط أمن الدولة في غرفة التعذيب، كان رابط أخ صحبي على السرير، وبيكهربو،،
    فبيقول لصحبي : ولااا قول أي نشيد جهادي من بتعكوا وأنا بكهربك :)
    راح الأخ قعد ينشد وهو بيتكهرب: نعم قاوم (آآآآآآآآآآآآه) لأنك فجرنا (آآآآآآآآآآآآآآه) قاوم و أمطر من سلالة صهيون (آآآآآآآآآآآآه) :)))

    *****

    9- أمن الدولة مسكت أخ سوداني (تاني) ، المهم دخلوه زنزانة الاحتجاز، الإخوة المعتقلين قالوا له: لو سألوك (حلايب وشلاتين) تبع مصر ولا السودان، قول تبع مصر
    السوداني غضب وقال: لا هلايب وشلاتين تبع السودان
    الإخوة: يا زول أحنا خيفين عليك، قول بس تبع مصر
    السوداني غاضبا: لا لا لا هلايب وشلاتين تبع السوادن
    جيه أمين الشرطة نادى على الأخ السوادني: الضابط عيزك
    السوداني طلع معه، الضابط سأله: حلايب وشلاتين تبع مصر ولا السودان ؟؟؟؟
    قاله: تبع السودان :)
    المهم شف اللي عمره ما شفه في السودان، كهربا وضرب وشتيمة
    راح السوداني من كتر التعذيب زعق بأعلى صوته وقال للضابط: الخرطوم نفسه تبع مصر :)))

    *****

    10 - ضابط أمن الدولة قاعد على مكتبه، وبيسأل الشيخ عبد الحميد كشك رحمه الله،
    بيقوله: تقدر تقولي أيه الفرق بينك وبين الحمار ؟؟!
    رد الشيخ كشك بخفة دمه: المكتب اللي بنا سعتك :)))

    *****

    11- الأخ زيكا، في غرفة التعذيب، كان نايم على مرتبة مبلولة ميه، علشان تعمل شغل مع الكهربا :)
    الضابط بيقوله: ياله اعترف يا بن تيييييييييييت
    قاله: خلاااااااااص يا باشا هعترف اهوه
    الضابط : ياله قول !
    راح زيكا قاله: طب صلي على النبي يا باشا :)
    الضابط: أنت هتحكيلي حدوته يا روح أمك :)))
    وعينك متشوف إلا النور،،، زيكا اتنفخ :)))

    *****

    12- بينما نحن في (سجن أبي زعبل - شديد الحراسة) فضيين ومورناش حاجة ،،،، فكرت أنا وأخ صحبي نعمل معرض للكتاب :)

    سمينه "مـعـرض أبـو زعـبـل (الـوهـمـــي) للـكـتـاب" ^،^

    وكانت معظم الكتب من تأليف العلامة أحمد الذكيري رحمه الله
    كتبه في محبسه بلظغولي :) وتناقلتها السجون
    لاء لاء الحمد لله، الشيخ أحمد الذكيري طلع عايش
    Ahmed EL-Zekairy@

    قائمة الكتب :)

    - رياض الأفراح في هلاويس المرواح :)
    - الكنوز الثقال في فوائد الاعتقال :)
    - الفكر الراسي في تجنب الاعتقال السياسي :)
    - تحفة الملوس في أحلام المحبوس :)
    - الأضواء والكشفات قبل الوقوع في الكلبشات :)
    - ستر العاري بحلم الإفراج الوزاري :)
    - الأماني والتراضي في الحصول على الانفرادي :)
    - صيحة نذير في انتظار افراج الوزير :)
    - الحبوب والاسبرين في التعامل مع المخبرين :)
    - البرسيم والحشيش في فهم عقلية الشويش :)
    - تهديد المكابر بغلق العنابر :)
    - البروق والومضات في فتح التريضات :)
    - الدموع والحسرات في اعترفات أصحاب المبادرات :)
    - الزلازل والبراكين في مشاكل التسكين :)
    - سكب الدموع في النزول الرجوع :)
    - تسلية الأخلة في التحقيقات المذلة بعد خلع السروال والفنله :)
    - بداية النهاية في ارتداء الغماية :)
    - تثيب الأخلاء عند الصعق بالكهرباء :)
    - تشويق الكئيب بالفرج القريب :)
    - تسلية الحزين بفراخ التعيين :)
    - التودد للأوغاد طريقك إلى الإرشاد :)
    - تعليق الخباء من الألف إلى الياء :)
    - الحيل المختارة لحجز الركن في الزيارة :)

    محدش هيفهم غير اللي كان محبوس قبل كده، والذكياء :D

    *****

    13- أخ طيب أمن الدولة مسكوه، جابوه الحجز لغاية من الضابط يطلبه،
    الأخ لما داخل الحجز وسمع صوت تعذيب الإخوة ، قالهم: هم المسلمين اللي فوق (يقصد امن الدولة) بيعذبوا المسلمين اللي تحت (يقصد الإخوة اللي في الحجز) لييييييييييييه؟
    الإخوة اعدو يضحكوا وقالولو: مسلمين! لما تتطلع هتعرف :)
    المهم صاحبنا الطيب الظابط طلبه، طلع فوق اتكهرب واتبهدل ،، نزل بيقول:
    هم الكفار اللي فوق بيعذبوا الكفار اللي تحت ليييييييييه؟؟
    الإخوة ماتوا من الضحك وقالولو: طب هم كفار أحنا بقى كفار لييييه؟
    الأخ قلهم: علشان سكتين على ظلم الكفار اللي فوق :)))

    *****

    14- العميد وائل نور رئيس فرع أمن الدولة بالجيزة (جابر بن حيان) ، كان بيحقق مع أخت (بس بميت راجل)
    في آخر التحقيقات قالها: هنتاقبل تااااااااااني
    ردت الأخت عليه: في الجنة مظنش :))) فاستشاط غضبًا

    *****

    15- عندما دخلت فرع أمن الدولة بالجيزة (جابر بن حيان) وجدت مكتوبا في مسجدهم لمسجد أسس على التقوى من أول يوم أحق أن تقوم فيه فيه"


    تابعوا الجزء الثاني

  2. #2

    افتراضي رد: نوادر السجون وأمن الدولة بقلم / أبو عبد القدير القمري ( إسماعيل جاد ) متجدد


    16- أمن الدولة مسكت أخ نيجيري اسمه "عيسى" وطبعا خد واجب الضيافة كاملا :)
    وهو خارج من غرفة التعذيب كان بيعيط وبيكلم نفسه بلهجة عربي مكسره : ايه جابك مصر يا إيسا .. دول جرو ورا موسى يا إيسا .. وهبسوا يوسف يا إيسا .. دي بلد فرئون يا إيسا :)))

    *****

    17- ضابط أمن دولة بيسأل أخ: تعرف فلان؟
    قاله: آه طبعا دا ابن عمتي..
    قاله: تعرفه منين؟
    قاله: ياباشا بقولك إبن عمتي!
    الظابط: انت ليه بتروح عنده البيت كتير؟
    الأخ: بروح عند عمتي وبما إنه إبنها فبلاقيه هناك :)))

    *****

    18- كل واحد فينا في أمن الدولة ليه رقم، تنسى اسمك خلاص وتحفظ رقمك، اللي هيلازمك لغاية ما تخرج من أمن الدولة!
    المهم أخ سيناوي لسه جي، الظابط بيقوله: رقمك كام ياله ؟؟؟
    رد عليه: زيرو عشره ياباشا :)))
    19- أمن الدولة مسكو أخ من كازخستان، الضابط وهو بيحقق معاه قاله: ولا أنت جت مصر علشان تعمل عمليات إرهابية؟
    رد الأخ: أنا لا أتحدث إلا اللغة العربية الفصحى
    راح الظابط قاله: حسنًا .. هل جأت إلى مصر لتقوم بأعمال تخريبية ؟
    الأخ: لا .. لم أتي إلى مصر لأي عمل تخريبي
    رح الظابط قال لأمين الشرطة: إذًا أضربه على قفاه :)))

    *****

    20- أحد الإخوة طلبوه في غرفة التعذيب، وربطوه على سرير الكهربا
    والظابط بيكهربه، راح الأخ قاله: ربي الذي يحي ويميت
    رد عليه الضابط : وأنا كمان بحي وبميت يابن تييييييييييييت
    رح الأخ قاله: إن الله يأتي بالشمس من المشرق فأت بها من المغرب
    الظابط : هجبها من ........ يابن تييييييييييييت
    فجأة جاله تليفون، شكلها مراته علشان بقى وديع في الكلام معها :) وبعد نص ساعة رجع للأخ وأقعد يكمل كهربا وقاله : وئفنا فين ياله ؟؟
    رد الأخ : وقفنا يا باشا عند "فبهت الذي الكفر " :)))

    *****

    21- واحد صحبي وهو في جلسة تعذيب، اتصلت أم الضابط اللي بيعذبه .. فكلمهم الضابط ، فالأخ عرف أنها أم الضابط
    أقعد يقول بصوت عالي: الحقيني يا حاجه ، أبنك بيعذبني يا حاجه :)
    راح الضابط بيقول لأمه : ده صوت التلفزيون يا ماما :)
    فرح الاخ بصوت عالي : لاء يا حاجه .. ده مش التلفزيون يا حاجه .. ابنك بيعذبني يا حاجه :)))

    *****

    22- ضابط أمن الدولة بيسأل أخ: اسمك الحركي أيه وسط الاخوة ؟؟
    الأخ: اسمي "الأخ الفاضل" !
    الضابط: ليييه بيسموك كده ؟؟
    الأخ: كنا في رحلة والاتوبيس مشي وسابني، فسموني "الأخ الفاضل" :)
    المهم خرج بعدها معلق دراعه شهور :)))

    *****

    23- طبعا أول ما بندخل أمن الدولة بنقلع كما ولدتنا أمهاتنا ! إلا طبعا "العين" هي ديه العورة عندهم، لازم يغطوها بالغماية !
    المهم أخ قام يصلي قيام الليل (وهو طبعا قالع!)
    وهو بيصلي، عدى ظابط أمن الدولة، أول ما شاف الأخ، زعق بأعلى صوته: أيييييييييييه ده ؟؟؟؟
    اتجمع المخبرييين بسرعة: في أيه يا باشا ؟؟
    الضابط: سيبين الشيخ بيصلي كده ازاااااااااااااي ؟؟؟؟
    المخبريين: طب نعمل أيه يا باشا ؟؟؟
    الظابط: حطه سترة علشان نعرف نعدي أقدم الشيخ علشان، منقطعش صلاته :)))

    *****

    24- ضابط أمن الدولة بيقول لأخ صحبي: تعرف يالا ، أنا أبليس معلق بوستراتي في اوضته :)))

    *****

    25- ضابط امن الدولة بيحقق مع أخ، الظابط قاعد على المكتب، والاخ قدمه وأمين الشرطه هو اللي بيكهرب الأخ
    المهم كل لما الأخ يلغبط، الظابط يقول لأمين الشرطة: كهربوا ..
    المهم جيه تليفون للظابط، فالظابط انشغل بالتليفون،، أمين الشرطة اتمل من الفراغ! قطه معديه راح مكهربها،، القطة صرخت ..
    الظابط ساب التليفون بسرعة وسب الدين لأمين الشرطة وقاله:
    يابن تييييييييييييييييت القطه ديه مش روح ،، حرام عليك تعذبها :))
    المهم الأخ سمع الظابط وكان هيموت من الغيظ :)))

    *****

    26- وأحنا في أمن الدولة، أخ بيقولنا: تعرفوا "رضا" (أمين شرطة آمن الدولة) كان نصراني وأسلم واشتغل في امن الدولة وبقى مرتد :)))

    *****

    27- يقول د. أيمن الظواهري عندما دخلت (سجن استقبال طرة) وجدت عبارة محفورة (على الحائط) تقول: "إذا سقطت المرأة أصبحت عاهرة، وإذا سقط الرجل أصبح شرطياً" :)))

    *****

    28- أمن الدولة كعادتهم، فى يوم كانوا بيلموا اى حد العاطل فى الباطل.. أخ اسمه محمود الرفاعي بيحكي بيقول:
    دخلت كالعادة فوجدت راجل شكله غريب ملوش فى حاجة خالص من شكله كدة وعمال يعيط , قلت له سلمها لله يا حج معلش متزعلش فسمعته بيدعو ربنا بصوت عالى ويقول " يا رب انت عارفنى لا بأصلى ولا لية دعوة بالناس دى , يا رب نجينى" :)))

    *****

    29- أمن الدولة اعتقلت واحد شيعي،، الشيعي ده كان بيتلطش من أمن الدولة ولما يدخل الزنزانة بيتلطش من المعتقلين :)
    في مرة نادى على الشويش: ياشويييييييييييييش
    الشويش جاله: عاوز أيييييييه ؟؟؟
    الشيعي: أنا هروح امتى ؟؟
    الشويش : تروح ! ده اللي بيقول "محمد رسول الله" مش هيروح ،، ما بالك بقى بالي بيقول "علي رسول الله" :)))

    *****

    30 - مرة وأحنا في أمن الدولة في جابر ابن حيان، أخ صحبي نادى "أمين الشرط" وقاله: عوزين ميه نشرب، رب يسقيك من شجرة الزقوم
    أمين الشرطة: آميييييين يارب، أنا وأبويا :)
    صحبي: أمييييييييييييين أنت وبوك
    المهم بعد كام يوم أمين الشرطة بيسمع قرآن على الموبيل، والشيخ العجمي بيقرأ "إن شجرة الزقوم طعام الأثيم" وعمال يبكي
    "أمين الشرطة" شك في الموضوع، راح سأل وعرف أن شجرة الزقوم ديه في جنهم
    فجاء غاضبًا ونادى على صحبي وكان رقم 5 : أنت يا 5 أقوم أوقف
    صحبي: فيه أيييييييييييه يا أمين
    أمين الشرطة: بتدعي علي أنا وأبويا نشرب من الزقوم اللي في جنهم
    صحبي: لا لا لا يا أمين انا مقلتش كده، أنا قلت ربنا يسقيك من "ماء زمزوم" مية زمزم وأحنا بندلعها :)
    قالها: ااااااااااااااه طب اقعد مكانك :)))

    تابعوا الجزء الثالث

  3. #3

    افتراضي رد: نوادر السجون وأمن الدولة بقلم / أبو عبد القدير القمري ( إسماعيل جاد ) متجدد


    31- أخ لسه أول يوم ليه في المعتقل، فالإخوة المعتقلين حبه يعملو فيه فصل :)
    المهم، كان في شيخ كبير ولحية بيضه، أول ما قابل الأخ راح اتعرف عليه وقاله: هو يبني لسه جمال عبد الناصر بيعتقل الناس ؟؟؟
    الأخ مفزوع : جمال عبد الناصر مااااااااااااات يا حج
    الشيخ: الحمد لله، طب يبني مين مسك البلد بعده؟
    الأخ: السادات يا حج
    الشيخ: برضه يبني بيعتقل في الناس ؟؟؟
    الأخ مفزوع جدا جدا: السادات اتقتل يا حج، هو أنتو بئلكم هنا قد أييييييييييييييييه :)))

    *****

    32- أمن الدولة في حملاته الغلط زي العادة، مسكو ناس ملهاش لا في الطور ولا طحين، المهم أخ بيحكي أنه سمع واحد من الناس دول بيدعي على (أمن الدولة) وهو ساجد في الصلاة بيقول: يا رب نجني من ولاد الوس-- دول :)))

    معذرة على اللفظ :d

    *****

    33-لما أمن الدولة مسكوني، جابوا كل أصحابي! منهم واحد جبوه شارب خمره، اه والله :)
    أول ما دخل الحجز، قعد جمب واحد من (الإخوان المسلمين)، راح الإخواني نادى على أمين الشرطة وقاله: تعالى شيل "الخواجة يني" ده من جنبي :)
    المهم "الخواجة يني" قعد في أمن الدولة 19 يوم ، قضهم في قراءة القرآن والصلاة وقيام الليل،، ضابط أمن الدولة شم خبر، راح طلبه في غرفة التحقيقات وقال: هو أنت جي تتوب عندنا يا روح أمك :)))

    *****

    34- في غرفة التحقيقات، وقف الضابط خلف مكتبه يعرف نفسه لأخينا وليد، والاخ وليد لمن لا يعرفه طول بعرض ماشاء الله :)
    المهم الضابط بيقوله: معك الضابط "فلان" 15 سنة صد عن سبيل الله
    رد الأخ وليد: معك الشيخ وليد 10 سنين "جهاد في سبيل الله" وهطلع م---- أمك، وجري عليه زنقه في ركن الغرفة وضرب الظابط علقة سخنة، لغاية مع المخبرين جم طلعوه من تحت وليد :)))

    معذرة على اللفظ :d

    *****

    35-ظابط أمن الدولة بيقول لأخ: مش عارف مراتك متمسكه بيك كده ليييييييه ؟! محبوس بقالك 10 سنين ، وهي بتلف وراك السجون، مش عارف على أييييييه؟
    رد الأخ بكل بساطة: ياباشا مراتي ملهاش غيري وأنا مليش غيرها، أنما أنت يا باشا ليك 100 وحده غير مراتك، ومراتك ليها 100 واحد غيرك :)))
    محدش يسألني الأخ أتعمل فيه أيه :)

    *****

    36-ظابط أمن الدولة بيقولنا: وأنتم ماشيين على الصراط هتلاقو تحتيكم فرعون، قولوله: يا باشا سبت وراك رجالة :))

    *****

    37-أمن الدولة مسكت واحد نصراني (من جنوب السوادن) بيتكلم عربي مكسر
    المهم دخلوه الحجز، الإخوة المعتقلين حبو يشتغلوه :)
    راح أخ قايل للتاني: تعرف، بيقولوا أنهم خرموا الربع جنيه
    رد الأخ: يااااااه، طب أنا بقى سمعت أنهم عملوا قطر بيمشي تحت الأرض
    رد الأخ التاني: ازاااااااااااااي
    السوداني حس أنهم بئلهم قرن في المعتقل :) راح مخبط على الباب وقعد ينادي بصوت عالي: يا بَااااااااااااااشا يا بَاشااااااااااااااا
    نزل الظابط: في أيييييييييييه يالا ؟
    السوادني: خرجني من عند المجرمييين دول يا بَاشااااااااااا
    الظابط قعد يضربوا بالإئلام على وشه ويقوله: دول مش مجرمييين يا ابن تييييييييييييت، دول جيييين علشان دينهم يا بن تييييييييييييت :)))

    *****

    39- ظباط أمن الدولة مسكين أخ في غرفة التعذيب وهرينه كهربا
    والأخ عمال يشتم: ياولود التيييييييييييييييت، يلعن تيييييييييييييت ....
    راح الضابط قيله: يا شيخ (لا يحب الله الجهر بالسوء) ‍!
    رد الاخ: ( إلا من ظلم ) يا ولاد الوس-- :)))

    معذرة على اللفظ :d

    *****

    40- حدث في سجن النطرون
    الشويش عبد العال بيسأل أخ: بتشتغل أيييه ؟؟
    رد الأخ : معيد (في الجامعة)
    رح الحمار عبد العال ضرب الأخ على قفاه وقال له: وكمان ساقط يا روح أمك :)))

    *****

    41- كان المجرميين في أمن الدولة، زيادة في التعذيب الجسدي، يتفنون في التعذيب النفسي، في وقت من الاوقات كان لازم كل أخ يسمي نفسه اسم وحده ست لإما يضرب بوحشية!
    الإخوة الصعايده كانوا عمرهم ما يسموا نفسم ويفضلوا التعذيب الجسدي، الإخوة بتوع وجه بحري كانوا بيخدوها بساطه :)
    المهم الشاويش بيقول لأخ: اسمك أيه ؟؟
    الأخ قعد بدور على اسم وراح قيله: حذيفه :)
    الشاويش افتكره اسم ست، قالوا طب عدي :)))

    *****

    42- واحنا في سجن أبو زعبل بقول لصديقي: تصدق يا أخي الحبس ده للجدعان :)
    رد عليّ بحزن: بس اللي متحبسش أجدع :)))

    *****

    43- واحنا في سجن ابو زعبل، كنا بنخفف علينا الهموم بعمل روضة، كل واحد يقف على باب الزنزانة بتعته، ونقرأ قرآن وأحاديث وشعر واناشيد جهادية وطرائف وكده
    المهم مرة عملين روضة وأخ بينشد أناشيد جهادية، راح واحد "جنائي" حب يشارك معنا في الروضة من زنزانته، فشارك معنا بنشيد: ذهب الليل طلع الفجر والعصفور صوصو :)
    واحنا فطسنا على نفسينا من الضحك )))

    *****

    44- أخ صحبي بيدعي على الشاويش حمدي وعلى حسني مبارك وعلى أمن الدولة، فالشويش قاله: يا شيخ بتدعوا علينا من سنة 80 مفيش حاجة حصلتلي !!
    رد الأخ: مانتا ربك سخطك شويش، مستني أيه تاني :)))

    *****

    45-في جهاز أمن الدولة كانوا مسكين أخ فرنسي مبيعرفش يتكلم غير لغة عربية فصحى، وكان رقمه 89،
    أمين الشرطية عامل ينادي عليه: تسعه وتمنين، تسعه وتمنيييين، تسعه وتمنيييييييييييييين
    جه أمين شرطة تاني، وقله مش هيرد عليك، أنا هندهله انا: تسعةٌ وثمانون ، رد الأخ الفرنسي: نعم :)))

    تابعوا الجزء الرابع

  4. #4
    تاريخ التسجيل
    Jun 2012
    المشاركات
    346

    افتراضي رد: نوادر السجون وأمن الدولة بقلم / أبو عبد القدير القمري ( إسماعيل جاد ) متجدد

    أضحك الله سنك وسن من كتبها (رائعة)
    هذا رجل مخضرم في السجون وأمن الدولة :)

    هناك مواقف يسيرة لي معهم ولله الحمد فغالب عمري خارج مصر.

    ــ أول مرة زاروني كنت في أول أجازة بعد سفري سنتين ونص، كان أخي الأكبر بايت عند إحدى أخواتي، فلما دخلوا الشقة وانتشروا بأسلحتهم، شغلوا مسجل أخي وكان فيه شريط للشيخ القطان، فلما شغل الشريط، كان أول ما قال الشيخ القطان:
    "لتقوم دولة إسلامية، لا تخضع للبيت الأبيض ولا للبيت الأحمر"
    الضابط بصلي وقلي انت لسه ملبستش؟!

    ــ أخذوا مجموعة من الشرايط منها ما يخص أخي، وأخذوا مجموعة كبيرة من كُتبي، طبعا الحاجات ديه مشفتهاش تاني، لكن لما زرتهم في 2010 شفت مكتبتهم العامرة المسروقة من مكتبات الإخوة.
    المهم في جابر بن حيان وصلت وحطوا الغماية على وعيني، الضابط سألني:
    كتبك ديه؟ قلتله أيوه، قعد يسردها بأسميها مع الأغلاط الفاحشة في القراءة وأسماء الكتب، فذكر كتاب لشيخ الإسلام ابن تيمية، قالي: انت كمان بتقرأ لابن تيمية الوهابي. :)

    ــ الكلام ده على ما أذكر كان سنة 95، كان السبب في زيارتهم أحد الإخوة اللي كانوا مسافرين معايا وكان نازل مصر أجازة معايا، الأخ ده لم سأله الضابط: بتصلي الجمعة فين في السعودية؟ الأخ قال بصلي عند الشيخ ابن عثيمين، الضابط قاله: ليه بالذات عند الواد ابن العسيكين ده؟

    ــ نزلت مصر في 2010 بعد غياب خمسة عشرة عاما متصلة، أحالوني في تصريح العمل على جابر بن حيان، كان موضوعي مع مقدم اسمه عمرو صالح، المهم رحت حوالي عشرين مرة أكتب بياناتي وتليفوني، وأجلسي خمس ست ساعات وأروح على الفاضي، فوجئت بالعيال بيصحوني من النوم وبيقولولي واحد صاحبك على الباب عايزك :)، فتحت الباب لقيت اللي بيقولي معاك المقدم عمرو صالح، قلتله اتفضل يا باشا، المهم قالي انت جيت من السفر امتى، قلتله 11 سبتمبر، استغرب من التاريخ وبصلي جامد وقالي اشمعنى، قلتله قدرا يا باشا.
    قالي تليفونك افتحه لأنه مقفول على طول، قلتله اتسرق يا باشا، قالي أشوفك بالليل النهاردة انت حالتك صعبة.

    ــ الباشا قبل مايديني تصريح السفر بيسألني كنت بتحضر لمين قبل سفرك، فقلتله كنت أغلب حضوري في مسجد الرحمة بالطالبية وكان بيجينا الشيخ الحويني والشيخ سعيد عبد العظيم والشيخ عبد المعبود حسن والشيخ يعقوب، قاطعني وقال ومحمود المصري قلتله تقريبا، طبعا الشيخ محمود المصري في الوقت ده لم يبدأ الدعوة أصلا.

  5. #5

    افتراضي رد: نوادر السجون وأمن الدولة بقلم / أبو عبد القدير القمري ( إسماعيل جاد ) متجدد

    اقتباس المشاركة الأصلية كتبت بواسطة أبو عبد الله الطُويلب مشاهدة المشاركة
    قال الشيخ القطان:
    "لتقوم دولة إسلامية، لا تخضع للبيت الأبيض ولا للبيت الأحمر"
    الضابط بصلي وقلي انت لسه ملبستش؟!
    أضحك الله سنك :)
    ــ نزلت مصر في 2010 بعد غياب خمسة عشرة عاما متصلة ،
    شكل حضرتك من عاشقى مصر :)
    وشكلك مشربتش ( القدر الكافى ) من نيلها :)

    بارك الله فيك ونفع بك ورفع قدرك وزادك علماً

  6. #6

    افتراضي رد: نوادر السجون وأمن الدولة بقلم / أبو عبد القدير القمري ( إسماعيل جاد ) متجدد

    كانت من غرائب القضايا في السجون المصرية :)
    رجل شاف في الحلم أنه راكب موتوسكل ووراه واحد صحبه، واغتالوا كلينتون رئيس أمريكا (سعهتا)
    المهم كعادة المصريين مبيتبلش في بئوهم فوله (^،^) قعد يحكي لكل أللي يشوفهم، لغاية ما الخبر وصل أمن الدولة، راحوا اعتقلوه 12 سنة!
    مش ده الغريب، الغريب أنهم اعتقلوا الشخص اللي كان راكب وراه الموتوسكل في الحلم هو كمان :)))

    #نوادر_السجون_وأمن_الدولة (47)

  7. #7

    افتراضي رد: نوادر السجون وأمن الدولة بقلم / أبو عبد القدير القمري ( إسماعيل جاد ) متجدد

    راحو يعتقلو واحد مش ملتزم
    امه نزلت وراه وهو راكب البوكس شاف امه بتجري ورا البوكس
    قالها ارجعي البيت يا بنت دين ...............
    ضابط امن الدولة قالهم .. نزلوووووه ..

    طالما بيشتم امه ويسب دين .. مش ده اللي عاوزينه

    مضحكات#مبكيات

  8. #8

    افتراضي رد: نوادر السجون وأمن الدولة بقلم / أبو عبد القدير القمري ( إسماعيل جاد ) متجدد

    بعض طرائف الشيوخ في الرد على اسئله الناس

    طرائف للشيخ عبد الله بن محمد المطلق الداعية أستاذ الفقه المقارن بالمعهد العالي للقضاء بجامعة محمد بن سعود الإسلامية بالرياض

    ،،

    أحد المتصلين سأل الشيخ

    قاله : ياشيخ يجوز اكل لحم البطريق؟؟

    قاله الشيخ اذا لقيته كله

    =============

    مره أتصلت عليه بنت

    قالت : ياشيخ أمي كبيرة بالسن وتزحف لاتستطيع المشي

    السؤال : ياشيخ هل أمي تعتبر من القواعد من النساء؟؟

    قاللها الشيخ :

    لا امك من الزواحف .. طبعاً قالها

    وهو يضحك وجاوب على سؤالها بعد المزحة الحلوة .

    =============

    موقف اخر للشيخ في برنامج على القناة الأولى ,, الموقف

    اتصل واحد على الشيخ

    وقال : ياشيخ انا قد طلقت زوجتي وكنت في وقتها

    في حالة غضب والحين كيف اراجعها ,,

    قال الشيخ (

    ياخي كل اللي يطلقون يطلقون وهم في حالة غضب ,

    انت عمرك شفت احد يطلق زوجته وهو جالس يأكل لب

    =============

    في أحد البرامج أتصل عليه مستفتي من اليمن وقال يا شيخ :

    ( انا ادخل بالجوال في دورة المياه ومخزن فيه القرآن الكريم )

    هل يجوز ذلك ؟

    جاوبه الشيخ : لابأس !!

    كرر السؤال فقال : لكن فيه القران مخزن ؟؟!!

    قال الشيخ : يا أخى لا بأس هو محفوظ في ذاكرة الجهاز... !

    رد السائل بقوله : هذا القرآن يا شيخ هل يجوز أن يدخل دورة المياة !!!؟؟

    قال الشيخ : أنت حافظ شي من القرآن؟

    جاوب السائل : نعم يا شيخ حافظ الكثير .

    قال الشيخ :

    خلاص اذا بدك تدخل دورة المياه

    خلي مخك برا

    ^_^

  9. #9
    تاريخ التسجيل
    Mar 2006
    الدولة
    Egypt
    المشاركات
    618

    افتراضي رد: نوادر السجون وأمن الدولة بقلم / أبو عبد القدير القمري ( إسماعيل جاد ) متجدد

    اضحتني اضحك الله سنك

    جزاك الله خيرا


معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •